नीति कार्यक्रम र सरकारको प्रभावकारिताका विषयमा छलफल
काठमाडौँ । प्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ र नेकपा (एमाले) का अध्यक्ष केपी शर्मा ओलीबीच सरकारले लिने नीति कार्यक्रम र सरकार सञ्चालनका बारेमा छलफल भएको छ ।
प्रधानमन्त्रीको निजी निवास खुमलटारमा आज भएको भेटवार्तामा उहाँहरुबीच सरकारको मूल नीति कार्यक्रम र कामकारबाहीलाई प्रभावकारी बनाउने विषयमा छलफल भएको अध्यक्ष दाहालका स्वकीय सचिव रमेश मल्लले जानकारी दिनुभयो । “उहाँहरुबीच सरकारलाई प्रभावकारी बनाउने विषयमा विहङ्गम छलफल भयो”, उहाँले भन्नुभयो ।
दाहाल नेतृत्वको मन्त्रिपरिषद्को पहिलो बैठकले गरेका निर्णयका बारेमासमेत उहाँहरुबीच छलफल भएको मल्लले जानकारी दिनुभयो । “सुशासन र सेवा प्रवाहलाई प्रभावकारी बनाउने सरकारको निर्णयलाई कार्यान्वयन तहमा लैजाने विषयमा कुराकानी भयो”, उहाँले भन्नुभयो ।
बिहीबार प्रधानमन्त्री निवास बालुवाटारमा दुई नेताहरुबीच थप छलफल हुने स्वकीय सचिव मल्लले जानकारी दिनुभयो । सो बैठकमा सत्ता साझेदार दलहरुको शीर्ष नेता सहभागी हुने उहाँको भनाइ छ । सरकार विस्तार, प्रदेश सरकारको बाँडफाँडका बारेमा आजको बैठकमा अनौपचारिक छलफल भए पनि त्यसले भोलि औपचारिकता पाउने उहाँले जानकारी दिनुभयो ।
प्रधानमन्त्री दाहालले आजै पूर्वप्रधानमन्त्री माधकुमार नेपालसँग पनि परामर्श गर्नुभएको जानकारी दिँदै उहाँले सो क्रममा सरकारलाई समर्थन र सहभागिताका लागि आग्रह गर्नुभएको जानकारी दिनुभयो ।
