काठमाडौँ। अर्जेन्टिनी फुटबल स्टार लियोनल मेसीले उत्कृष्ट दुई गोल गरि हारतर्फ उन्मुख भई रहेको इन्टर मियामीलाई लिग्स कप फुटबल प्रतियोगिताको क्वार्टरफाइनलमा पुर्याउन सफल भएका छन् । सोमबार खेलिएको खेलमा इन्टर मियामीले एफसी डालासलाई पेनाल्टी सुटआउटमा हराउँदै क्वार्टरफाइनलमा पुगेको हो ।
खेल निकै प्रतिस्पर्धात्मक थियो । खेलको प्रारम्भमा नै मेसीले इन्टर मियामीका लागि पहिलो गोल गरेका थिए । उनले खेलको छैटौं मिनेटमा गोल गर्दै इन्टर मियामीलाई अग्रता दिलाएका थिए तर, त्यसपछि इन्टर मियामी दबाबमा परेको थियो ।
खेलको ३७ औं मिनेटमा एफसी डालासका लागि फाकुन्डो क्विगननले पहिलो गोल गरेका थिए । ४५ औं मिनेटमा बेनार्ड कामुन्गोले एफसी डालासलाई २—१ गोलले अग्रता दिलाएका थिए । ६३ औं मिनेटमा एलन भेलास्कोले एफसी डालासका लागि तेस्रो गोल थपेपछि इन्टर मियामी ३—१ ले पछाडि परेको थियो।
त्यसपछि खेलको ६५ औं मिनेटमा बेन्जामिन क्रेमास्चीले इन्टर मियामीका लागि दोस्रो गोल गरेका थिए । खेलको ६८ औं मिनेटमा इन्टर मियामीका रोबर्ट टेलरबाट आत्मघाति गोल भयो । त्यतिबेलासम्म एफसी डालास ४—२ गोलले अगाडि थियो ।
खेलको ८० औं मिनेटमा एफसी डालासका मार्को फार्फनले गोल गरेका थिए। खेल अन्तिमतिर पुगिसक्दा पनि एफसी डालास ४—३ गोलले अगाडि थियो । निर्धारित समयको खेल सकिनुभन्दा पाँच मिनेटअघि मेसीले आकर्षक गोल गरेका थिए । उनले फ्रिकिक मार्फत उक्त गोल गरेका थिए ।
मेसीको उक्त गोलका कारण निर्धारित समयको खेल ४—४ को बराबरीमा सकियो । त्यसपछि पेनाल्टी सुटआउटमा इन्टर मियामीले बाजी मार्यो । पेनाल्टी सुटआउटमा इन्टर मियामीले एफसी डालासलाई ५—३ गोलले पराजित गर्यो ।
पेनाल्टी सुटआउटमा पनि मेसीले गोल गरेका थिए । मेसीले इन्टर मियामीका लागि हालसम्म चार खेल खेलेका छन् । उनले क्लबका लागि सात गोल गरिसकेका छन् । मेसीले खेलेको सबै खेलमा इन्टर मियामी विजयी भएको छ ।
