काठमाडौं। अन्तर्राष्ट्रिय मिडियामा यतिबेला एउटा शब्द चर्चामा छ, बार्बेनहाइमर । विश्व बक्स अफिसमा एकसाथ रिलिज भएपछि ‘बार्बी’ र ‘ओपेनहाइमर’लाई संक्षिप्तमा ‘बार्बेनहाइमर’ भन्न थालिएको छ ।
ग्रेटा गरविग निर्देशित फेन्टासी कमेडी फिल्मले विश्व बक्स अफिसमा अपेक्षा गरे भन्दा ‘ब्लकबस्टर’ ओपनिङ गरेको छ । फिल्मले पहिलो सप्ताहन्त विश्वभर ३३७ मिलियन डलर र ‘ओपेनहाइमर’ले १७४.२ मिलियन डलरको ओपनिङ गरेका छन् ।
मार्गो रोबी र रायन गोस्लिङ अभिनित फिल्म ‘बार्बी’ले ६९ वटा विदेशी बजारबाट मात्र १८२ मिलियन डलर कमाएको छ। जुन गैरफ्रेन्चाइजी फिल्मका लागि आक्रामक ओपनिङ हो । सोही समयमा क्रिस्टोफर नोलन र सिलियन मर्फी स्टारर फिल्मले ७८ बजारबाट ९३.७ मिलियन डलर कमायो ।
अहिले विश्वभर चलेको ‘बार्बेनहाइमर’ ट्रेन्डले दुवै फिल्मको कमाइमा उछाल आएको हो । क्रिटिक्सले यी दुवै फिल्मका बारेमा सकारात्मक समीक्षा प्रदान गरेका छन् भने दर्शकले पनि मीठो प्रतिक्रिया दिएका छन् । हड्तालको कारण हलिउड बजार प्रभावित भइरहेको बेला यी दुई फिल्मको कमाइले हलिउडलाई राहत दिएको अनुमान गरिएको छ ।
वार्नर ब्रदर्स इन्टरनेसनल थिएटरिकल डिस्ट्रिब्युसनका अध्यक्ष एन्ड्रयु क्रिप्स भन्छन्, ‘सबै उमेरका दर्शकले रमाइलो र शक्तिशाली तरिकाले प्रतिक्रिया दिइरहेका हामीले देखेका छौं । रमाइलो र आकर्षक अनुभव प्रदान गर्ने फिल्म निर्माताको एकल दृष्टिकोणको प्रमाण हुन् यी ।’
फिल्म कन्सल्टिङ फर्म फ्रेन्चाइज इन्टरटेनमेन्ट रिसर्च चलाउने डेभिड ए ग्रोस भन्छन्, ‘यी फिल्मलाई हेर्नका लागि स्पष्ट रूपमा यो उत्कृष्ट सप्ताहन्त हो ।’ ‘बार्बी’ र ’ओपेनहाइमर’ बक्स अफिसमा एकअर्काका पूरक हुन्, दर्शकले एकअर्को भनेर विभाजन गरेका छैनन् । समर फिल्महरुले हलिउडमा राम्रो कमाइ गर्न नसकिरहेको बेला यी दुई फिल्मले हलिउडलाई उद्धार गर्ने प्रक्षेपण गरिएको छ ।
