काठमाडौँ। एएफसी कप छनोटको प्रारम्भिक चरणमा भुटानी क्लब पारो एफसीलाई हराउँदै मछिन्द्र एफसी प्रारम्भिक छनोटको दोश्रो चरणमा पुग्न सफल भएको छ ।
खेलको सातौँ मिनेटमा पछि परेको अवस्थालाई उल्टाउँदै खेलमा मछिन्द्र विजयी भएको छ ।
७औँ मिनेटमा पारोका काजुओ होम्माले गोल गरेका थिए तर त्यसको ५ मिनेटपछि विमल घर्ती मगरले बराबरी गोल फर्काए ।
एरिक विष्टको छोटो कर्नर पास र आयुष घलानको क्रसमा विमलले हेडमार्फत गोल गरेका थिए ।
त्यसपछि १५ औं मिनेटमा घलानले पुन गोल गरेर मछिन्द्रलाई अग्रता दिलाएका थिए । विमलले पेनाल्टी क्षेत्र भित्रबाट मिलाएको पासमा आयुषले पहिलो टचमा सुन्दर गोल गरेका थिए ।
३९ मिनेटमा ओलावाले आफिजले गोल गरेपछि मछिन्द्रले ३ १ को अग्रता बनाएको थियो । ओमालाजा करिमको पासमा ओलावालेले गोल गरे र टिमलाई ३ १ को अग्रता दिलाए ।
७१औँ मिनेटमा पारोका लागि इभान अशान्तेले १ गोल थपे तर यो गोल जितका लागि पर्याप्त भएन ।
खेलको ८९ औँ मिनेट काजोउले पेनाल्टी बक्सभित्रबाट गरेको प्रहारलाई विशाल श्रेष्ठले उत्कृष्ट बचाउ गरेका थिए ।
विजेता मछिन्द्रले अब १६ अगष्टमा भारतको इन्डियन सुपर लिग खेल्ने मोहन बगानसँग कोलकातामा खेल खेल्ने छ ।
यो खेलको विजेताले बंगलादेशको ढाका अबहानी र माल्दिभ्सको क्लब इगल्स बीचको विजेतासँग अगष्ट २२ मा प्रतिश्पर्धा छ ।
