काठमाडौँ । कोरियन पप ग्रुप ‘ब्ल्याकपिंक’ की गायिका जिसु आफ्नो प्रेम सम्बन्धलाई सार्वजनिक गर्ने हाइप्रोफाइल के–पप स्टारमध्ये एक बनेकी छन् । स्टारको निजी जीवनका पक्षमा चियोचर्चो गर्ने चञ्चल प्रशंसक र दबाब दिने रेकर्ड कम्पनीको बीचमा जिसुको रिलेसनसिपको खबरले फ्यानहरु उत्साहित प्रतिक्रिया दिई रहेका छन् ।
२८ वर्षीया गायिका जिसु र ३५ वर्षीया अभिनेता आन बो ह्युन प्रेम सम्बन्धमा रहेको खबर सार्वजनिक भएपछि सामाजिक सञ्जालमा आँधी नै आएको छ । यी दुई स्टारहरु यतिबेला विश्व मिडियाको हेडलाइन बनेका छन् ।
कोरियाली मिडियाले दुई स्टारबीच राम्रो भावनात्मक सम्बन्ध रहेको र एकअर्का बिच चिनजान गरिरहेको उल्लेख गरेका छन् । यी दुई स्टारसँग सम्बन्धित एजेन्सीले बिहीबार रिलेसनसिपलाई स्वीकार गर्दै प्रशंसकलाई उनीहरुको समर्थन र समझदारीका लागि आग्रह समेत गरेका छन् ।
अभिनेता आनले इटावोन क्लास र युमिज सेल्सजस्ता चर्चित दक्षिण कोरियाली सिरिजमा अभिनय गरेका छन् । हालैका वर्षहरूमा एक्जो र ट्वाइसजस्ता हाइ–प्रोफाइल समूहका सदस्यले पनि रिलेसनसिपबारे सार्वजनिक गरेका थिए । तर के–पप उद्योगमा शीर्ष स्टारले आफ्नो निजी जीवनको बारेमा विरलै धेरै कुरा गर्ने भएकाले यस्ता घोषणा असामान्य हुने गरेको छ ।
एक दशक पहिले, एजेन्सीले नयाँ स्टारलाई डेटिङ गर्न वा व्यक्तिगत मोबाइल फोन राख्न प्रतिबन्ध लगाउने नियम सामान्य थियो । रोमान्टिक सम्बन्ध वा साझेदारको कुनै पनि प्रवेश प्रशंसकको लागि अपमानजनक हुने मानिन्थ्यो ।
सिंगापुरको नान्याङ टेक्नोलोजिकल युनिभर्सिटीका समाजशास्त्री प्याट्रिक विलियम्सका अनुसार निजी सम्बन्धमा रहेका सेलिब्रिटी व्यवसायका लागि नराम्रो हुन सक्छन् । ‘उनीहरुले कम्तीमा काल्पनिक रुपमै सही रोमान्टिक जस्तो देखिने स्टारको लोकप्रियता बिक्री गर्न चाहन्छन् । प्रशंसकले सेलिब्रिटीसँगको सामाजिक सम्बन्धलाई कुनै न कुनै रूपमा आफूमा कल्पना गर्न चाहन्छन्,’ डा. विलियम्सले बताए ।
चार सदस्यीय ब्याण्ड ब्ल्यापिंकका लागि गायिका जिसु सामान्य के पप स्टार होइनन् ।
ब्ल्याकपिंक विश्वको सबैभन्दा लोकप्रिय ब्याण्डमध्ये एक हो जसले प्रतिष्ठित कोचेलाजस्ता प्रमुख कन्सर्टमा समेत प्रस्तुति दिएका छन् । आफ्ना कन्सर्टमा हजारौंलाई आकर्षित गर्ने ब्याण्डका सदस्यको निजी इन्स्टाग्राम एकाउन्टमा ७३ मिलियनदेखि ९३ मिलियन फलोवर्स छन् ।
जिसु रोमान्टिक सम्बन्धलाई स्वीकार्ने पहिलो ब्ल्याकपिंककी ब्याण्ड मेम्बर हुन् । यो ब्याण्डको एजेन्सी वाईजी इन्टरटेनमेन्टले यसबारे टिप्पणी गर्न अस्वीकार गरेको छ । ब्याण्डका फ्यानले भने यसबारे सकारात्मक प्रतिक्रिया दिएका छन् । जिसुको इन्स्टाग्राम खातामा ‘बधाई बेबी’ लेखिएको टिप्पणीलाई तीन हजार भन्दा बढी पटक मन पराइएको छ ।
बिलबोर्डका लागि एसियाली संवाददाता रोब श्वाट्र्ज भन्छन्, ‘तथ्य यो हो कि उनी आफ्नो करिअरको शिखरमा छिन् । मलाई लाग्छ कि यसले उनलाई असामान्य बनाउँछ ।’ तुलनात्मक रूपमा अर्को के पप ब्याय ब्याण्ड बीटीएसका कुनै पनि सदस्यले अहिलेसम्म डेटिङको कुरालाई स्वीकारेका छैनन् ।
