काठमाडौँ। नेपाली ओलम्पिक पौडी खेलाडी गौरिका सिंहले जापानको फुकुओकामा आयोजना भइरहेको २० औं संस्करणको वर्ल्ड एक्वाटिक च्याम्पियनसिप २०२३ मा अर्को नयाँ राष्ट्रिय कीर्तिमान बनाएकी छन् ।
बुधबार भएको महिला ५० मिटर ब्याक स्ट्रोकमा उनले ३१ दशमलव ४४ सेकेण्डमा दूरी पूरा गर्दै आफ्नै नाममा रहेको कीर्तिमानमा सुधार गरेको नेपाल पौडी संघका अध्यक्ष अशोक बज्राचार्यले जानकारी दिएका छन् ।
यसअघि यो किर्तिमान गौरिकाकै नाममा ३१ दशमलव ८७ सेकेण्डको राष्ट्रिय कीर्तिमान थियो ।
१३औं सागमा ४ स्वर्ण पदक जितेकी गौरिकाले यसअघि वर्ल्ड एक्वाटिक च्याम्पियनसिपमा १०० मिटर ब्याक स्ट्रोकमा पनि आफ्नै कीर्तिमान सुधार गर्दै नयाँ राष्ट्रिय कीर्तिमान बनाएकी थिइन् ।
यस्तै महिला २०० मिटर फ्रिस्टायलमा नेपालकी डुवाना लामाले व्यक्तिगत समयमा सुधार गरिन् । उनले २ मिनेट १२ दशमलव ४६ सेकेण्डमा निर्धारित दूरी पूरा गर्दै २ मिनेटमा १२ दशमलव ७६ सेकेण्डको समयमा सुधार गरेकी हुन् ।
